Smania ‘e paese

[di Umberto Marino]

Oggi m’aggio fatto ‘nu giro p’ ’o paese
pecché ‘a jurnata era schiarata bbona,
pareva già arrivata ‘a primmavera
ma forse è solamente l’illusione.

All’angolo ‘e via Italia e piazza Moro
ce steva ‘na maniata ‘e vicchiarielli
che arraggiunava cu vigorìa e passione
ranno iurizio ‘n coppa a chisto e a chella.

Chiù annanz’, ‘nu tipo assaje alliccato,
cu ll’aria ‘e saputiello d’ogni cosa,
se ‘ntratteneva a salutà chiunque
le se fermava ‘nfaccia, cu ‘na scusa.

Pure Peppino, fujeva annanz’ e aret’
cu ‘na guantera ‘e cafè e bevande;
gia dieci vote era iuto ‘o municipio.
Tutto stu movimento è preoccupante…

Into ‘o paese ce sta ‘n aria strana,
tutta sta smania, sta fibbrillazione,
po’ all’improvviso me so arricurdato:
fra quacche mese ce stanno l’elezioni.

‘O popolo fa ‘a scerta e chi cummanna,
chi adda decidere ‘a sciorta e stu paese,
tra chi, pe chistu scanno, se fa annanza
e gia prummette e nun ‘ngannà l’attesa. 

So’ nomi e facce ‘e gente canusciuta;
tizio c’ha gia pruvato ‘n ata vota;
pe caio, invece, è ‘n esperienza nova
e s’adda smalizià pe’ cercà aiuto.

St’aria frizzante, che oggi si respira,
che dà speranza e genio e nuvità,
è comme a ‘na ventata ‘e primmavera
che ‘o friddo ‘e vierno te po fa scurdà.

27 febbraio 2021 – © Riproduzione riservata