Vierno

Stasera ‘o tiempo s’è cagnato ‘e botto:
‘a luna s’annasconne ‘mmiezo ‘o cielo
e ‘o viento ca s’è aizato tutto ‘nzieme
fa tremmulià ‘na luce e ‘nu lampione.

È vierno.
T’o ddice ll’aria scura e minacciosa,
t’o ddice ‘o truono ca ogne tanto siente;
mentre ‘a primm’acqua tozza ‘nfaccia ‘e lastre
suspira ‘a ggente e leva ‘e panne spase.

Io sulo so contento e nun me ‘mporta
si viento, truone e lampe fore fanno.
I’ dint’o core tengo ‘a primavera
e ‘o sole brilla pecché tengo a tte!

Giulio D’Alessio

23 marzo 2019 – © Riproduzione riservata

Facebooktwittergoogle_plusmail